بیر گئریدن گؤر اؤتوشن دورانی سئیر ائله قیشدا اکیلن بستانی
تعریف ائله سؤنکولارا دستا نی باخ کی نه لر ائتدی خیال دووشانی
اؤنجه دوشوندو هر ایشین آخرین
دولت تدبیر و امید ، آفرین
واردی بیزیم ائولکه ده بیر نر کیشی ملته میدان اوخوماقدیر ایشی
بس کی خوش آهنگدی فرمایشی سانکی سپیر
سؤزله نخودکیشمیشی
کورپودن آنجاق یئریدیر اؤز خرین
دولت تدبیر و امید ، آفرین !
آدی حسن شؤهرتی روحانی دی گؤپچولارین معنوی سلطانی دی
اهلِ دمه منبری مجانی دی هرکس اونون باغدا غزلخوانی دی
آچمالیدی عرصه ده بال و پرین
ایندی گلین قول و قرار دان دییه ک
آلدادیجی موفته شعاردان دییه ک
دیش قیجیدان زیرپی آچاردان دییه ک
یاخجی ایلین ایلکی ، باهاردان دییه ک
سؤز ناوا رین اوّله بیر قئیترین
تورکه وئرن سؤزلریوی یاد ائله علم و هنر اهلینی امداد ائله
خانة فرهنگینی آباد ائله دوستاقا دوشموشلری آزاد ائله
بلکه اولا یانمیش اوره کلر سرین
دولت تدبیر و امید آفرین
حقّیدی قانون دئییشی هر کسه دایر اولا اؤزدیلیجه مدرسه
ال بیر اولوب وئرمه لییک سس سسه میدانی تاپشیرما بو خارو خسه
یاغی لرین باغلا قاچاق معبرین
دولت تدبیر و امید آفرین
تلویزیوندا بیر ایکی دنگیلی
هردن اولورکین و نفاق عامیلی
تاب گتیرنمز لاغا تورکون دیلی گؤزلرینه سوخمالیسان داغ میلی
تا باشیمیزدان سووالار شرلرین دولت تدبیر و امید آفرین
سیزده دی تقصیرات آخی آی ده ده چون بوراخیرسیز قودوقو مسجیده
ایسته میریک حؤرمته دوشسون زده یوخسا گرک تولکونو اصلان دیده
قورد اؤنونه آز کوچوقو گؤنده رین
ای که دیلین موفته یئره سان وئریر دربش آخی اورمو گؤلو جان وئریر
هانسی حکیم نسخة درمان وئریر مجلس اونون ترسینه فرمان وئریر
اولدو یارامیز گونو گوندن درین
دولت تدبیر و امید آفرین !؟
چاره قیلین درده تاپین درمانی منطقه ده حتمی دی دوز طوفانی
اؤلدوره جک انسانی هم حیوانی بنزه دجک بوزقیرا باغ بستا نی
چای لاری دوز مقصدینه چونده رین
هانسی قزئتچی خبری دوز یازیر یاز یئرینه گلسه یئری گوز یازیر
ارشاد اونون تئز «باشینی اوز » یازیر
حتا تکرلر یئلینه سوز یازیر
توتمالیدیر داشقاسینین پنچرین
دولت تدبیر و امید آفرین
اقتصادا وئردی ، دواملی ثبات ائتدی تورم شاهینی کیش و مات
بیر یئنی جان تاپدی وطنده حیات تا کی رفاه ائششکیمیز اولدو آت
ملتیمیز چکدی کئفین جوهرین
دولت تدبیر و امید آفرین
سالدی اثردن هامی تحریم لری ! قوردو جهانلا دانیشیق سیم لری
ایرانا گلدی باریشیق تیم لری دوشدو ایشه توسعه سیستیم لری
اوستا حسن آغریماسین اللرین
دولت تدبیر و امید آفرین
ماحمیدا تای دیکدی چاخان بایراغین ساده جه یوخدور بئله سیرتالماغین
دوزدو دویونلرده آچیب دیرناغین چوخ آتیلیب دوشمه کی پاتلار آغین
دینجووا چیخ بیر اوزویون سیل ترین
دولت تدبیر و امید آفرین
سؤیله دی : ای بچه ها کی می دونه به تُرکی
به چی میشه؟ بگید، ها ؟
کیمسه دن سس چیخمادی ! ال قالدیریب سؤیله دیم :
خانم معلم ، هــئـــیـــو ا ! ! !
قیزیمی آلقیشلادیم اوزده سئویندیم اما اؤز ایچیمده آغلادیم
آخی بیز اوشاق ایکن سوروشاردیق بیربیردن
کیم بیلیری هئیوایا نه دئییلیر فارسی جا ؟ !
ایتمیشدی حقیقت ایشیقی تهمت ایچینده سؤنموشدو فضیلت چراغی ظلمت ایچینده
آفت گؤرنوردو گؤزه هر نعمت ایچینده بُـتـلار دیریـلیردی تـزه دن امت ایچینده
اوز وئردی بو اوضاعیده عصیانی حسینین
تاریخ بویو اسمکده دی طوفانی حسینین
باش ایمک اولار اوردا کی حاکمدی ضلالت ؟ آیا ده یری وار حیاتین ، اؤلسه عدالت ؟
غئیر تـلی یه هیهات قبول ائیلیـیه ذلت عزت یولونا تا ائده انسانی دلالت
دوراندا یاییلدی اولو برهانی حسینین
تاریخ بویو اسمکده دی طوفانی حسینین
ائتدی حرکت قافله سی کرب و بلا یه اعلان ائله دی سون سؤزونو اهل جفایه
تا خلقه جهالت بولودو سالمییا سایه شمشک سایاغی شاخدی او مسموم فضایه
تانریلا وارایدی بئله پیمانی حسینین
تاریخ بویو اسمکده دی طوفانی حسینین
دنیاده بؤیوک شخص بو دنیایه گولندی آلچاق لیقا اویماز من ایله کیمسه گلندی
مغلو ب او دگیل کی سانیسیز بوردا اؤلندی گر دین محمد اؤلوموم له دیریلندی
بو تهلوکه ده گئتمه لیدی جانی حسینین
تاریخ بویو اسمکده دی طوفانی حسینین
اصحابینین او صحنه ده اخلاصینی گؤردوز؟ ایثار دنیزینده سیرا دالغاسینی گؤردوز؟
اوخلا بزه نن قانلی مصلاسینی گؤردوز ؟
غیرت داغی نین زیروه سی عباسی نی گؤردوز؟
اورمان دا باخین وار نئجه اصلانی حسینین
تاریخ بویو اسمکده دی طوفانی حسینین
انسان اودو کی دنیادا صاحب هدف اولسون
دین اهلی ا گر اولماسا اهل شرف اولسون
یاغی قاباقیندا جوابی لا تخف اولسون دریای شهامتده ، وجودی صدف اولسون
اردم گهری بسلیری عمانی حسینین
تاریخ بویو اسمکده دی طوفانی حسینین
یاندی بساطی اولدو اوباسی ائلی غارت
ایثار ایله بیر لیکده نشان وئردی جسارت
هر درده دوام ائتدی مگر قید اسارت معشوقه طرف قانلی الی ائتدی اشارت
حرّیته قیمت قازانیب قانی حسینین
تاریخ بویو اسمکده دی طوفانی حسینین
دوزدو قوشونو اؤلدو قیامین سسی باتدی
سرلشکری نین سیندی بئلی بایراقی یاتدی
لاکن او هارایلا کی یاتان خلقی اویاتدی
یاتماز او قیامت کی بو قامتده یاراتدی
اولدو ابدی ،دفتر و دیوانی حسینین
تاریخ بویو اسمکده دی طوفانی حسینین
اولـدو اسـرا کـاروانی شـامـه روانـه ظـا هرده یزیدین الینه دوشدو بهانه
نهضت باغی لاکن تزه دن وئردی جوانه
زینب ائله کی باشلا دی تفسیر و بیا نه
گؤرسندی گنه گؤرمه لی جولانی حسینین
تاریخ بویو اسمکده دی طوفانی حسینین
خفت داشینی چالدی یزیدین تپه سیندن
وحشت سوکوتو سیندی شجاعتلی سسیندن
آزاد ائله دی کینه نی سینه قـفسیندن نهضت یئنی جان تاپدی مسیحا نفسیندن
لخلتدی یزیدین کاخینی شانی حسینین
تاریخ بویو اسمکده دی طوفانی حسینین
کیملردی بو اندیشه نی تعلیم ائلیینلر لبیک دئییب وار یوخو تسلیم ائلیینلر
ای باشه چالیب گؤز یاشی تقدیم ائلیینلر سونرا باش اگیب قورخویا تعظیم ائلیینلر
گل اول عمل و فکریده قربانی حسینین
تاریخ بویو اسمکده دی طوفانی حسینین
هر کس اؤزونو سانسا حسینین مداریند لازمدی حمیت قانی گزسین داماریندا
هر محکمه ده دورمالیدی حق کناریندا هیچ اگری گرک اولمویا نیت عیاریندا
اخلاص عملدی بیزه فرمانی حسینین
جیسمیمده گنه دیرچه لیری جان یوموراقی
قدرت یئتیریر قلبیمه ، ایمان یوموراقی
عادت ائله مک منده، بئله بنده چتین دیر
گؤرستمه لییم تولکویه اصلان یوموراقی
انگین یاراما دوز باسیلیر اؤز دنیزیمدن
دردین دنینی تاپدالا ، درمان یوموراقی
ای سئل گوجونون آبیده سی خائن اؤنونده
ای تورک ائلینین فخری کاظم خان یوموراقی
قویماز دره بی لر دره لرده سو دیکلسین
باغلی بره لر ییخماسا ، عصیان یوموراقی